المشاركات
عصفور ورايح يرخص عشه خايف من التيار
وقف امام الغابه تايه ومحتار
وقال مين بيرخص عشش العصافير يا شطار
وكان بتبعه وشايفه من بعيد الثعلب المكار
وسحبه بره الغابة بعيد عن الأنظار
وقال له فين العش وفين عقد الإيجار
سمع كلامه العصفور وخد نفسه وطار
وحضر الأوراق والرسم والأمتار
وشويه طلع الثلعب يعين حدود الجار
وقال له يا عصفور متشغل الأفكار
العش مش قانوني والأمر عاوز له حوار
وإن كنت عاوز حل فكر بليل ونهار
وفكر العصفور ملئاش أمامه خيار
وبسرعة راح للثعلب يفوت عليه في الدار
وقال ايه المطلوب أنا خلاص هنهار
وصبري خلاص انتهي من كثرة المشوار
قال له النهاية تفهم وتشغل المنقار
فهم مراده ودفع له من قوت عياله صغار
وطار في السما يشتكي من الظلم للجبار
لأنه مش من طبعه متربي مع الأحرار
وقال ياميت خسارة علي عيشة الأبرار
الدنيا صارت غابة في قبضة الأشرار
يا رب أنت القوي وعالم الأسرار
قادر تخلص عبادك م الظلمة والفجار
ليست هناك تعليقات:
إرسال تعليق